दिशा सालियन प्रकरणात मोठे वळण, वकिलांच्या विधानाने बड्या नेत्याच्या अडचणी वाढल्या?

दिशा सालियन प्रकरणाला आता नवीन वळण लागले आहे. दिशाचे वडील, सतीश सालियन यांनी आदित्य ठाकरे, रिया चक्रवर्ती आणि परमजीत सिंग यांच्या तातडीने अटकेची मागणी केली आहे. त्यांनी ही मागणी थेट केंद्रीय अन्वेषण विभागाकडे (CBI) केली असून, आरोपींना योग्य शिक्षा व्हावी अशी त्यांची अपेक्षा आहे. सतीश सालियन यांचा जबाब सीबीआयने सविस्तरपणे नोंदवला आहे. सतीश सालियन यांच्या वकिलांनी दिलेल्या माहितीनुसार, या प्रकरणात लवकरच गुन्हा दाखल केला जाईल. वकिलांनी स्पष्ट केले की, कायद्यानुसार, तपास यंत्रणांनी नोंदवलेले स्टेटमेंट हेच एफआयआरचे स्वरूप घेते.

त्यामुळे, सतीश सालियन यांनी दिलेला जबाब हाच एफआयआर म्हणून विचारात घेतला जाईल आणि पुढील कायदेशीर प्रक्रिया सुरू होईल. हा तपास प्रक्रियेतील एक महत्त्वाचा टप्पा पार पडला असल्याचे वकिलांनी सांगितले. तपासावर परिणाम होऊ नये म्हणून सध्या काही माहिती उघड करता येणार नाही, असेही नमूद करण्यात आले. येत्या एक-दोन दिवसांत सीबीआयच्या अधिकृत वेबसाइटवर एफआयआर प्रसिद्ध होईल, अशी शक्यता आहे, ज्यामुळे कथित आरोपींची नावे सार्वजनिक होतील. अत्याचारानंतर हत्या झाल्याचा दावा वकिलांनी केला असून, आरोपींवर कठोर कारवाईची मागणी कायम आहे.