Sanjay Raut : शिंदेंनी दसरा मेळावा अहमदाबाद, बडोद्याला घ्यावा, कारण… राऊतांनी उपरोधिक सल्ला देत डिवचलं

महाराष्ट्रामध्ये दसरा मेळाव्यावरून राजकीय वातावरण चांगलेच तापले आहे. शिवसेना उद्धव बाळासाहेब ठाकरे गट आणि बाळासाहेबांची शिवसेना (शिंदे गट) या दोन्ही पक्षांकडून मेळाव्याचे टीझर जारी करण्यात आले आहेत, ज्यात एकमेकांवर अप्रत्यक्षपणे टीका केली जात आहे. शिंदे गटाने भगवे विचार आणि भगवं रक्त या घोषणेसह टीझर प्रसिद्ध केला, तर ठाकरे गटाने विचार ठाकरेंचा, आवाज महाराष्ट्राचा असे म्हणत आपली भूमिका स्पष्ट केली आहे. एकनाथ शिंदे गटाचा दसरा मेळावा आझाद मैदानावर होणार असून, उद्धव ठाकरे यांचा मेळावा शिवतीर्थावर (शिवाजी पार्क) आयोजित करण्यात आला आहे.

शिवसेना (उद्धव बाळासाहेब ठाकरे) नेते संजय राऊत यांनी शिंदे गटावर निशाणा साधत, त्यांनी आपला दसरा मेळावा अहमदाबाद किंवा बडोद्याला घ्यावा आणि त्याला केंद्रीय गृहमंत्री अमित शाह व जय शाह यांना बोलवावे, असा उपरोधिक सल्ला दिला आहे. तसेच, मुंबईतील दसरा मेळावा बाळासाहेबांच्या परंपरेनुसारच होईल, असे राऊत यांनी स्पष्ट केले. यावर शिंदे गटाचे नेते प्रताप सरनाईक यांनी प्रत्युत्तर दिले आहे.