मुंबईचा महापौर महायुतीचाच असेल, एकनाथ शिंदे यांचा विश्वास

एकनाथ शिंदे यांनी आगामी मुंबई महापालिका निवडणुकीत महायुतीला १५० जागा मिळतील, असा विश्वास व्यक्त केला आहे. टीव्ही 9 मराठीला दिलेल्या मुलाखतीदरम्यान ते बोलत होते. मुंबईचा महापौर मराठीच असेल आणि तो महायुतीचा असेल, असे शिंदे यांनी ठामपणे सांगितले. भाजप सर्वाधिक जागा लढवत असली तरी महापौर महायुतीचाच असेल, असे त्यांनी स्पष्ट केले. खुर्चीसाठी नव्हे, तर मुंबईच्या विकासासाठी महायुती काम करत असल्याचे त्यांनी नमूद केले.

शिंदे यांनी राज ठाकरे यांच्यावर अप्रत्यक्षपणे टीका केली. केवळ भाषणे करून लोकांचे पोट भरत नाही, तर त्यांना सोयीसुविधा द्याव्या लागतात, असे ते म्हणाले. महायुती सरकारने अडीच ते तीन वर्षांत लोकांना सुविधा पुरविल्या आहेत, याकडे त्यांनी लक्ष वेधले. गेली २५ वर्षे शिवसेनेचा महापौर होता, मात्र आता बदल होईल आणि जनतेच्या विकासाला प्राधान्य मिळेल, असेही शिंदे यांनी म्हटले.