टायगर श्रॉफच्या गाडीवर गोळीबार, एकनाथ शिंदेंनी घेतली अभिनेत्याची भेट; म्हणाले, गुन्हेगारांना…

महाराष्ट्राचे उपमुख्यमंत्री एकनाथ शिंदे यांनी नुकतीच अभिनेता टायगर श्रॉफची त्याच्या जुहू येथील निवासस्थानी भेट घेतली. टायगर श्रॉफच्या गाडीवर झालेल्या गोळीबारानंतर शिंदे यांनी ही भेट घेऊन त्याची आणि त्याच्या कुटुंबीयांची विचारपूस केली. मुंबईत कोणत्याही गुन्हेगारी टोळीची दादागिरी किंवा गँगवॉर खपवून घेतले जाणार नाही, असे स्पष्ट शब्दांत उपमुख्यमंत्री शिंदे यांनी सांगितले. या घटनेमुळे टायगर श्रॉफ आणि त्याचे कुटुंबीय दहशतीखाली व चिंतेत असल्याचे शिंदेंनी नमूद केले. त्यांनी कुटुंबीयांना धीर देत, सरकार आणि मुंबई पोलीस त्यांच्या पाठीशी खंबीरपणे उभे असल्याचे आश्वासन दिले.

तसेच, मुंबई पोलिसांनी या गुन्हेगारांना तात्काळ पकडून त्यांच्यावर कठोर कारवाई करावी, असे निर्देशही शिंदेंनी दिले आहेत. कलाकारांना घाबरण्याची गरज नाही, असे सांगत त्यांनी संपूर्ण फिल्म इंडस्ट्रीतील कलावंतांच्या सुरक्षेचा आढावा घेण्याच्या सूचना पोलीस आयुक्तांना दिल्या आहेत. मुंबईची कायदा व सुव्यवस्था राखण्यासाठी सरकार कटिबद्ध असल्याचे या भेटीतून अधोरेखित झाले.