Gokul Elections : गोकुळ निवडणुकीत शपथांचं राजकारण; शपथ मोडल्यास ब्रेन स्ट्रोक येतो, के.पी. पाटील असं का म्हणाले?

कोल्हापूर जिल्ह्यातील गोकुळ दूध संघाच्या निवडणुकीत शपथांचे राजकारण तापले आहे. माजी आमदार के.पी. पाटील यांनी आदमापूर येथील बाळूमामा मंदिर परिसरात आपल्या ठरावधारकांना संबोधित करताना एक धक्कादायक विधान केले. “बाळूमामाची शपथ मोडल्यास ब्रेन स्ट्रोक येतो”, असे पाटील म्हणाले. त्यांच्या या विधानामुळे राजकीय वर्तुळात मोठी चर्चा सुरू झाली आहे.

यापूर्वी मंत्री हसन मुश्रीफ यांनीही सौंदत्ती डोंगरावर ठरावधारकांना शपथ देताना, खोटे बोलल्यास देवी अंगावर उठेल, असे म्हटले होते. महायुतीतील नेत्यांकडून मतदारांना अशाप्रकारे शपथा देण्याचे प्रकार सुरू आहेत. कोल्हापूर जिल्ह्याची ओळख पुरोगामी जिल्हा म्हणून असताना, अशाप्रकारची वक्तव्ये आणि शपथा देणे कितपत योग्य आहे, असा प्रश्न आता उपस्थित होत आहे. महायुतीमधील अंतर्गत बेबनाव यापूर्वीही प्रचारादरम्यान दिसला होता. आता मतदानाच्या दिवशीही ठरावधारकांवर अविश्वास दाखवून त्यांना अशा धार्मिक शपथा दिल्या जात असल्याने, एकंदरच राजकीय संस्कृतीवर प्रश्नचिन्ह निर्माण झाले आहे.