Price Rate Hike : सणासुदीत सर्वसामान्यांना महागाईचा झटका; ताटातील भाजीपासून डाळीपर्यंत सर्वच महाग, काय आहेत नवे दर?
किरकोळ महागाई दर 5.54 टक्क्यांवर पोहोचला असून, भाजीपाला आणि अन्नधान्याच्या वाढत्या किमतींमुळे सर्वसामान्यांचे बजेट कोलमडले आहे. 42 पैकी 41 जीवनावश्यक वस्तू महागल्या आहेत, ज्यात कांद्याच्या दरात 113 टक्के वाढ झाली आहे. डाळी, खाद्यतेल आणि तांदळाचे दरही वाढले असून, सणासुदीच्या काळात नागरिकांना मोठा आर्थिक फटका बसत आहे.
भारतात किरकोळ महागाई दराने पुन्हा एकदा उसळी घेतली आहे. हा दर 4.83 टक्क्यांवरून 5.54 टक्क्यांवर पोहोचला आहे. भाजीपाला आणि अन्नधान्याच्या वाढत्या किमती हे या महागाईमागे प्रमुख कारण आहे. सरकारने देखरेख ठेवलेल्या 42 जीवनावश्यक वस्तूंमधून 41 वस्तूंच्या किमतीत गेल्या वर्षभरात वाढ झाली आहे, केवळ बटाटा स्वस्त झाला आहे.
सणासुदीच्या काळातच ही वाढ झाल्याने सर्वसामान्य नागरिकांना मोठा आर्थिक फटका बसत आहे. सप्टेंबरमध्ये किरकोळ महागाई 5.5 टक्क्यांपर्यंत पोहोचली होती, ज्यात अन्नधान्य महागाईचा दर 7.74 टक्के नोंदवला गेला. कांद्याच्या किमतीत सर्वाधिक म्हणजे तब्बल 113 टक्क्यांनी वाढ झाली आहे. एक किलो कांद्याचा भाव 53 रुपयांपर्यंत पोहोचला आहे, तर राज्यात दुष्काळामुळे दरात आणखी वाढ होण्याची भीती व्यक्त केली जात आहे. तूरडाळ, चणाडाळ, सूर्यफूल तेल, मोहरीचे तेल, पाम तेल, सोया तेल, साखर, टोमॅटो आणि तांदूळ यांसारख्या अनेक वस्तूंचे दर मोठ्या प्रमाणात वाढले आहेत. यामुळे सर्वसामान्यांच्या खिशावर ताण पडत आहे.
