World Cup 2025 : भारतीय महिला क्रिकेट संघाची वर्ल्डकप फायनलमध्ये धडक, विजयापासून 1 पाऊल दूर

भारतीय महिला क्रिकेट संघाने विश्वचषकाच्या अंतिम फेरीत स्थान मिळवून एक ऐतिहासिक कामगिरी केली आहे. उपांत्य फेरीच्या सामन्यात भारताने बलाढ्य ऑस्ट्रेलिया संघावर पाच गडी राखून दणदणीत विजय मिळवला. ऑस्ट्रेलियाने नाणेफेक जिंकून प्रथम फलंदाजी करताना ३३८ धावांचा डोंगर उभारला होता. यामध्ये फिबी लिचफिल्डने शतक झळकावले, तर एलिसा पेरीने ७७ आणि एश्ले गार्डनरने ६३ धावांचे महत्त्वपूर्ण योगदान दिले.

भारताने ३३९ धावांचे आव्हान ४८.३ षटकांत पूर्ण करत विजय मिळवला. या विजयाचे शिल्पकार ठरल्या जेमिमा रॉड्रिग्ज आणि कर्णधार हरमनप्रीत कौर. जेमिमाने १३४ चेंडूंमध्ये १४ चौकारांसह नाबाद १२७ धावांची दमदार खेळी केली. तर तिने हरमनप्रीतसोबत १६७ धावांची महत्त्वपूर्ण भागीदारी रचली. नॉकआउट सामन्यात शतक झळकावणारी जेमिमा हरमनप्रीत कौरनंतरची दुसरी भारतीय खेळाडू ठरली. हा भारतीय संघाचा वन-डे क्रिकेटमधील सर्वात मोठ्या धावसंख्येचा यशस्वी पाठलाग होता. आठ वर्षानंतर भारतीय महिला संघाने विश्वचषकाच्या फायनलमध्ये धडक मारली आहे. आता अंतिम सामना येत्या रविवारी दक्षिण आफ्रिकेविरुद्ध होणार आहे.