KDMC Election : कल्याण-डोंबिवलीत महायुतीचे 9 उमेदवार निकालापूर्वीच नगरसेवक, कोणाचे किती उमेदवार बिनविरोध?

कल्याण-डोंबिवली महापालिका निवडणुकीच्या निकालापूर्वीच महायुतीने आघाडी घेतली आहे. महायुतीचे एकूण ९ उमेदवार बिनविरोध विजयी झाले आहेत. यामध्ये भाजपचे ५ तर शिंदे गटाच्या शिवसेनेचे ४ उमेदवार समाविष्ट आहेत. अर्ज मागे घेण्याच्या अंतिम मुदतीपूर्वीच महायुतीला हा मोठा दिलासा मिळाला आहे. मंदा पाटील, ज्योती पाटील, रेखा चौधरी, आसावरी नवरे, रंजना पेणकर (भाजप) आणि रमेश म्हात्रे, विश्वनाथ राणे, वृषाली जोशी, हर्षल मोरे (शिंदे शिवसेना) हे बिनविरोध निवडून आलेले उमेदवार आहेत.

शिंदे गटाच्या नेत्यांनी या विजयाचे श्रेय उपमुख्यमंत्री एकनाथ शिंदे यांना दिले. कोरोना काळापासून शिंदे यांनी केलेल्या विकासकामांसाठी निधी उपलब्ध करून दिल्यामुळे जनतेचा विश्वास संपादन झाल्याचे नेत्यांनी म्हटले. दरम्यान, महापालिका निवडणुकांमध्ये आतापर्यंत एकूण २० उमेदवार बिनविरोध निवडून आले आहेत. यात भाजपचे १०, शिंदे गटाचे ७, राष्ट्रवादी अजित पवार गटाचे २ आणि इस्लाम पार्टी मालेगावचा १ उमेदवार आहे. आज उमेदवारी अर्ज मागे घेण्याचा शेवटचा दिवस असून, बंडखोरांची समजूत काढण्याचे प्रयत्न सुरू आहेत.