Karuna Munde : करुणा मुंडे काँग्रेसमध्ये प्रवेश करणार? हर्षवर्धन सपकाळ यांची घेतली भेट; चर्चांना उधाण

करुणा मुंडे यांच्या काँग्रेस प्रवेशाच्या चर्चांनी सध्या राजकीय वर्तुळात जोरदार वेग घेतला आहे. नुकतीच त्यांनी काँग्रेसचे प्रदेशाध्यक्ष हर्षवर्धन सपकाळ यांची भेट घेतली असून, या भेटीनंतर त्यांच्या संभाव्य पक्षप्रवेशाबाबतच्या चर्चांना आणखी बळ मिळाले आहे.

मिळालेल्या माहितीनुसार, करुणा मुंडे यांना काँग्रेस पक्षातर्फे काही जबाबदाऱ्या आणि पदाचे पर्याय सुचवण्यात आले आहेत. तसेच, त्यांना पद देण्याबाबतही आश्वासन मिळाल्याचे सांगितले जात आहे. मात्र, या सर्व घडामोडींवर करुणा मुंडे यांनी अद्याप कोणताही अंतिम निर्णय घेतलेला नाही, असे स्पष्ट केले आहे. “वडट्टीवार साहेबांनी पण इच्छा दर्शवली होती की भाजपमध्ये मुंडे आहे, तो काँग्रेसमध्ये पण मुंडे पाहिजे,” असे करुणा मुंडे यांनी म्हटले आहे. त्यांच्या काही हितचिंतकांनीही त्यांना काँग्रेसमध्ये प्रवेश करण्याचा सल्ला दिला आहे.

करुणा मुंडे यांनी हर्षवर्धन सपकाळ यांच्यासोबतच काँग्रेस नेते विजय वडेट्टीवार यांच्याशीही चर्चा केल्याचे सांगितले. आपल्याकडून कोणताही निर्णय झाल्यास, त्याची माहिती १०० टक्के प्रसारमाध्यमांना देणार असल्याचे आश्वासन त्यांनी दिले आहे. या भेटीगाठींमुळे महाराष्ट्राच्या राजकारणात आणखी एका संभाव्य प्रवेशाची भर पडण्याची शक्यता वर्तवली जात आहे.