Kolhapur : ज्या चुलत्याचं सोनं चोरलं, त्याच्याच हस्ते थारची पूजा; पुतण्याचं कृत्य उघड, चुलत्यालाच दिला मोठा धक्का

कोल्हापूर जिल्ह्यातील पन्हाळा तालुक्यातून एक धक्कादायक चोरीचा प्रकार समोर आला आहे. पन्हाळा तालुक्यातील सातवे गावात एका पुतण्याने आपल्या चुलत्याच्या घरी चोरी करत चक्क थार गाडी खरेदी केली. या घटनेने परिसरात एकच खळबळ उडाली आहे.

मिळालेल्या माहितीनुसार, पुतण्या समर चव्हाण याने आपल्या चुलत्याच्या घरातून १५ तोळे सोन्याची चोरी केली होती. ही चोरी केल्यानंतर त्याने त्या पैशातून एक नवी थार गाडी खरेदी केली. विशेष म्हणजे, ज्या चुलत्याच्या घरातून चोरी झाली होती, त्याच चुलत्याच्या हस्ते या नवीन थार गाडीची पूजा करण्यात आली.

या चोरीप्रकरणी संशय आल्यानंतर पोलिसांनी तपास सुरू केला. तपासादरम्यान, पुतण्या समर चव्हाण यानेच ही चोरी केल्याचे निष्पन्न झाले. पोलिसांनी तातडीने कारवाई करत आरोपी पुतण्या समर चव्हाण याला ताब्यात घेतले आहे. तसेच, चोरीचे दागिने खरेदी करणारा सोनार संग्राम मोरे यालाही पोलिसांनी अटक केली आहे. या घटनेमुळे नात्यांमधील विश्वासाला तडा गेल्याचे बोलले जात आहे. पोलीस या प्रकरणाचा अधिक तपास करत आहेत.