Sangola Nagar Parishad Election: काय तो मतदार, काय तो विजय… सगळं कसं ओक्के! शहाजीबापू पाटलांनी सांगोल्यात राखला गड

सांगोला नगरपरिषद निवडणुकीच्या निकालांमध्ये शिंदे गटाचे आमदार शहाजीबापू पाटील यांच्या पॅनेलने दैदिप्यमान विजय संपादन केला आहे. त्यांचे उमेदवार आनंद माने यांनी दुसऱ्या फेरीतच निर्णायक आघाडी घेतल्याने विजयाची निश्चिती झाली. या महत्त्वपूर्ण विजयानंतर बोलताना शहाजीबापू पाटील यांनी सांगोला शहरवासीयांनी शिवसेनेवर (शिंदे गट) दाखवलेल्या विश्वासाबद्दल कृतज्ञता व्यक्त केली. राज्याचे उपमुख्यमंत्री एकनाथ शिंदे यांनी प्रचाराचा नारळ फोडल्याचे सांगत, शिंदे साहेबांना जनतेचे पाठबळ असल्याची भावना या विजयामुळे अधिक दृढ झाल्याचे त्यांनी सांगितले. या निवडणुकीत पाटील यांच्या विरोधात सर्वच प्रमुख पक्षांनी एकत्र येत युती केली होती, ज्यामुळे त्यांना एकट्याने लढा द्यावा लागला. मात्र, या एकतर्फी लढ्याला जनतेने पाठिंबा दिल्याचे पाटील यांनी नमूद केले.

“राजकारणात नेते जरी एकत्र आले, तरी जनसामान्यांच्या भावना महत्त्वाच्या असतात,” असे ते म्हणाले. त्यांना खात्री होती की जनतेला ही युती मान्य होणार नाही. सांगोला तालुक्याची एक वैचारिक बैठक आहे, जी स्वर्गीय भाई गणपतरावजी देशमुख यांच्या विचारांच्या धाटणीत तयार झाली आहे. तसेच, गेल्या 40 वर्षांपासून पाटील यांनी या तालुक्यात एक वेगळी वैचारिक फळी तयार केली आहे, जी या युतीच्या विरोधात होती. जनतेने शिवसेनेला (शिंदे गट) भरभरून पाठिंबा देऊन भरघोस मतदान केल्याबद्दल त्यांनी तमाम मतदारांचे मनापासून आभार मानले.