Congress-RSP Alliance : काँग्रेसचा सर्वात मोठा निर्णय, महत्त्वाच्या पक्षाशी थेट युतीची घोषणा; राज्यातलं राजकारण बदलणार?

महाराष्ट्र राज्यातील आगामी पालिका निवडणुका, विशेषतः मुंबई महानगरपालिका (BMC) निवडणुकीसाठी काँग्रेस आणि राष्ट्रीय समाज पक्षाने (रासप) युतीची घोषणा केली आहे. काँग्रेसचे प्रदेशाध्यक्ष हर्षवर्धन सपकाळ यांच्या उपस्थितीत ही महत्त्वाची घोषणा करण्यात आली. राष्ट्रीय समाज पक्षाचे अध्यक्ष महादेव जानकर यांनी या युतीमागील भूमिका स्पष्ट करताना, देशाचे संविधान वाचवण्यासाठी काँग्रेससोबत एकत्र येत असल्याचे सांगितले.

जानकर यांच्या माहितीनुसार, ही युती प्रत्यक्षात 31 मे रोजीच झाली आहे. काँग्रेस आणि रासप एकत्र येऊन महाराष्ट्रभरातील येणाऱ्या नगरपालिका, जिल्हा परिषद या स्थानिक स्वराज्य संस्थांच्या निवडणुका लढवणार आहेत. इतकेच नाही तर, आगामी लोकसभा आणि विधानसभा निवडणुकांमध्येही दोन्ही पक्षांनी एकत्र लढण्याचा मानस व्यक्त केला आहे. देशाची लोकशाही जिवंत ठेवण्यासाठी या विचाराने एकत्र येणे आवश्यक असल्याचे महादेव जानकर यांनी नमूद केले. या युतीमुळे महाराष्ट्राच्या राजकारणात नवीन समीकरण उदयास आले आहे.