ब्रेकिंग! शिंदे गटातील दोन प्रमुख नेते मुख्यमंत्री फडणवीसांना भेटले; वर्षा बंगल्यावर नेमकं काय शिजलं?

राज्यातील राजकारणात मोठी घडामोड घडली असून शिवसेना ठाकरे गटातील 6 खासदारांनी बंडखोरी करत शिवसेना शिंदे गटात प्रवेश केला आहे. उपमुख्यमंत्री एकनाथ शिंदे यांच्या उपस्थितीत हा पक्षप्रवेश पार पडला असून ठाकरे गटासाठी हा मोठा धक्का मानला जात आहे.

या घडामोडीनंतर उद्धव ठाकरे यांच्याकडे असलेल्या खासदारांची संख्या 9 वरून थेट 3 वर आली आहे. दुसरीकडे, या सहा खासदारांच्या प्रवेशामुळे शिंदे गटाची ताकद वाढली असून त्यांच्या खासदारांची संख्या 13 वर पोहोचल्याची माहिती समोर येत आहे.

दरम्यान, राजकीय वर्तुळात आणखी एक महत्त्वाची घडामोड घडली आहे. नुकतेच शिंदे गटात प्रवेश केलेले खासदार ओमराजे निंबाळकर आणि शिंदे गटाचे नेते तानाजी सावंत हे मुख्यमंत्री देवेंद्र फडणवीस यांच्या भेटीसाठी वर्षा निवासस्थानी गेले होते. त्यांच्या या भेटीमुळे राजकीय चर्चांना उधाण आले आहे.

सूत्रांच्या माहितीनुसार, बंडखोरीच्या सुरुवातीच्या काळात ओमराजे निंबाळकर यांची भूमिका काहीशी अनिश्चित होती. त्यांनी आपल्या मतदारसंघातील कार्यकर्त्यांशी चर्चा करून निर्णय घेणार असल्याचे सांगितले होते. त्यावेळी त्यांच्या भूमिकेमुळे ‘ऑपरेशन टायगर’ संदर्भातील रणनीती अडचणीत येण्याची शक्यता निर्माण झाली होती.

यानंतर उपमुख्यमंत्री एकनाथ शिंदे यांनी या प्रक्रियेची जबाबदारी तानाजी सावंत यांच्याकडे सोपवली होती. सावंत यांनी ओमराजे निंबाळकर यांचे मन वळवण्यात यश मिळवले आणि त्यानंतर त्यांनी शिंदे गटात प्रवेश केला असल्याचे सांगितले जाते.

आता ओमराजे निंबाळकर आणि तानाजी सावंत यांची मुख्यमंत्री फडणवीस यांच्याशी होणारी भेट महत्त्वाची मानली जात असून या घडामोडीत वकील निलेश देशमुख हेदेखील उपस्थित असल्याची माहिती आहे. त्यामुळे राज्यातील राजकीय हालचालींना आणखी वेग आला आहे.