Video : मालाडमध्ये कोकण कन्या एक्स्प्रेसमध्ये विराजमान बाप्पा, गणेशोत्सवाची अनोखी संकल्पना

मुंबईतील मालाडमध्ये यंदाच्या गणेशोत्सवात बाप्पाच्या आगमनाची एक विलक्षण आणि लक्षवेधी झलक पाहायला मिळत आहे. मालाड पूर्वेतील डायमंड मार्केट जवळ एका गणेश मंडळाने भाविकांचे लक्ष वेधून घेण्यासाठी एक अनोखी संकल्पना साकारली आहे. या मंडळाने कोकण कन्या एक्स्प्रेस आणि चिपळूण रेल्वे स्टेशनची हुबेहूब प्रतिकृती उभारली आहे. या भव्य आणि जिवंत वाटणाऱ्या देखाव्यात बाप्पा विराजमान झाले आहेत. ट्रेनचा डबा, इंजिन आणि चिपळूण स्टेशनचा संपूर्ण परिसर इतका वास्तविक वाटतो की, पाहणारे थक्क होतात. दरवर्षी वेगवेगळ्या, कल्पक संकल्पना साकारण्यासाठी प्रसिद्ध असलेल्या या मंडळाने यंदा कोकण कन्या एक्स्प्रेसची निवड करून कोकणातील प्रवास आणि गणेशोत्सवाचा अनोखा संगम घडवला आहे.

हा देखावा केवळ गणेशमूर्तीचे दर्शन घडवत नाही, तर भाविकांना एका वेगळ्याच दुनियेत घेऊन जातो. रेल्वे प्रवासाची आठवण करून देणारा हा देखावा, विशेषतः कोकणवासीयांना आणि रेल्वेप्रेमींना अधिक भावुक करत आहे. मंडळाच्या या प्रयत्नांचे सर्वत्र कौतुक होत असून, मालाडमधील हा रेल्वेतले बाप्पा अनेकांसाठी आकर्षणाचे केंद्र बनला आहे. गणेशोत्सवातील पारंपरिक उत्साहात या आधुनिक आणि कल्पक देखाव्याने भर घातली आहे.