लेखी आश्वासन मिळेपर्यंत आंदोलन मागे घेणार नाही; आदिवासी विद्यार्थ्यांचा मोठा निर्णय

पुणे जिल्ह्यातील मांजरी येथे गेल्या १७ दिवसांपासून सुरू असलेले आदिवासी विद्यार्थ्यांचे आंदोलन अखेर यशस्वी झाले आहे. मुख्यमंत्र्यांसोबत झालेल्या बैठकीत या विद्यार्थ्यांच्या मागण्यांवर सकारात्मक चर्चा झाली असून, राज्य सरकारने त्या मान्य केल्या आहेत. त्यामुळे हे आंदोलन आज मागे घेतले जाण्याची शक्यता आहे. आदिवासी विकास मंत्री अशोक उईके स्वतः आंदोलनस्थळी येऊन विद्यार्थ्यांशी संवाद साधणार आहेत.

मात्र, जोपर्यंत लेखी आश्वासन आणि शासनादेश (जीआर) हाती मिळत नाही, तोपर्यंत उपोषण मागे घेतले जाणार नाही, अशी आंदोलक विद्यार्थ्यांची स्पष्ट भूमिका आहे. त्यांनी म्हटले आहे की, प्रवासाचा वेळ वगळता अडीच-तीन तासांत मंत्री महोदय आणि शिष्टमंडळ पोहोचेल आणि जीआर सादर करेल, त्यानंतरच आंदोलनाच्या समाप्तीची घोषणा केली जाईल. हे आंदोलन कोणत्याही राजकीय पक्षाचे नसून, विद्यार्थ्यांच्या संविधानिक मागण्यांसाठीचा लढा असल्याचे विद्यार्थ्यांनी सांगितले आहे. त्यांच्या १४ प्रमुख मागण्या रास्त असल्याचे सरकारनेही मान्य केले आहे.