मुंबईतील जरांगेंच्या आंदोलनाच्या पार्श्वभूमीवर कोर्टात याचिका, नेमकं काय घडतंय?

मनोज जरांगे पाटील यांच्या मुंबईतील प्रस्तावित आंदोलनाविरोधात एमआय फाऊंडेशनने मुंबई उच्च न्यायालयात याचिका दाखल केली आहे. जरांगे पाटील सध्या बीडमध्ये असून, मुंबईत येण्यावर ते ठाम आहेत. मात्र, त्यांच्या आझाद मैदानावर होणाऱ्या आंदोलनाला परवानगी देऊ नये, अशी मागणी या याचिकेद्वारे करण्यात आली आहे. याचिकाकर्त्यांनी असे म्हटले आहे की, जरांगे पाटलांच्या आंदोलनामुळे मुंबईतील सार्वजनिक वाहतूक व्यवस्था विस्कळीत होऊ शकते, रस्ते बंद पडू शकतात, तसेच रुग्णालये आणि रेल्वे स्थानकांच्या कामांवरही परिणाम होऊ शकतो.

गेल्या वर्षीही एमआय फाऊंडेशनने जरांगे पाटलांच्या आंदोलनादरम्यान न्यायालयात हस्तक्षेप याचिका दाखल केली होती. मनोज जरांगे पाटलांनी यापूर्वी मुंबई पोलिसांकडे दोनदा परवानगी मागितली होती, परंतु ते अर्ज नाकारण्यात आले होते. त्यांनी आता तिसरा अर्ज 50 लोकांसाठी आंदोलनाची परवानगी मागण्यासाठी दिला आहे, ज्यावर पोलीस वेट अँड वॉचच्या भूमिकेत आहेत. आता मुंबई उच्च न्यायालय या याचिकेवर तात्काळ सुनावणी घेते की नाही, हे पाहणे महत्त्वाचे ठरणार आहे.