जरांगे पाटलांच्या उपोषणाचा तेरावा दिवस, सरकारच्या हालचालींना वेग

मनोज जरांगे पाटील यांच्या अंतरवाली सराटी येथील उपोषणाचा आज तेरावा दिवस आहे. मराठा आरक्षणाच्या मागणीसाठी सुरू असलेल्या या आंदोलनावर तोडगा काढण्यासाठी आता सरकारच्या हालचालींना वेग आला आहे. मिळालेल्या माहितीनुसार, आमदार विजयसिंह पंडित आणि राजेश विटेकर यांनी काल रात्री मनोज जरांगे पाटील यांच्यासोबत तब्बल अडीच तास चर्चा केली. या चर्चेत विविध मागण्यांवर सविस्तर विचारविनिमय करण्यात आला. विजयसिंह पंडितांनी सांगितले की, मराठा आरक्षणावर लवकरच मार्ग निघेल. मुख्यमंत्री आणि मराठा आरक्षण उपसमितीसोबत या संदर्भात चर्चा केली जाईल. त्यांनी मुंबईत आंदोलन करण्याची वेळ येणार नाही, असे आश्वासनही दिले.

१२ तारखेला अंतरवाली सराटी येथे एक महत्त्वाची राज्यव्यापी बैठक आयोजित करण्यात आली आहे. या बैठकीत मुंबई येथे होणाऱ्या आंदोलनाची पुढील दिशा आणि स्वरूप जाहीर केले जाईल. गेल्या दोन दिवसांपासून जरांगे पाटलांशी कोणतीही चर्चा झाली नव्हती, मात्र अजित पवार गटाच्या या आमदारांच्या भेटीने तोडगा निघण्याच्या आशा पल्लवित झाल्या आहेत.