मराठा आरक्षणासाठी ऐतिहासिक पुरावे शोधणार; जरांगे पाटलांची अभ्यासकांना मोठी हाक

मराठा आरक्षणाच्या मागणीसाठी ऐतिहासिक नोंदी आणि दस्तऐवज शोधण्याच्या मोहिमेला वेग देण्यासाठी मनोज जरांगे पाटील यांनी मोडी लिपी, फारसी आणि उर्दू अभ्यासकांना विशेष आवाहन केले आहे. २१ सप्टेंबर रोजी शासनाने काढलेल्या परिपत्रकानुसार, या अभ्यासकांना नोंदी आणि दस्तऐवज शोधण्यासाठी विशेष अधिकार दिले जाणार आहेत. या पार्श्वभूमीवर, जरांगे पाटील यांनी मराठवाडा, पश्चिम महाराष्ट्रासह राज्यातील सर्व पात्र अभ्यासकांना छत्रपती संभाजीनगर येथील गॅलेक्सी हॉस्पिटल येथे उद्यापासून रविवारपर्यंत संपर्क साधण्याचे आवाहन केले आहे.

समाजाच्या कल्याणासाठी योगदान देण्यासाठी ही एक सुवर्णसंधी असून, अभ्यासकांनी स्वतःहून पुढे येऊन आपली नावे नोंदवावीत, असे त्यांनी म्हटले आहे. या कामासाठी हैदराबादसह विविध ठिकाणच्या जुन्या नोंदी तपासण्यात येणार आहेत. फक्त ज्यांना मोडी लिपी, फारसी किंवा उर्दूचे थोडेफार ज्ञान आहे, अशांनीच येऊन सहकार्य करावे, असेही त्यांनी स्पष्ट केले.