Meenakshi Shinde PC : दिशा सालियन प्रकरणाचा दाखला देत मीनाक्षी शिंदेंचा राऊतांना सवाल; मात्र पूर्णेकर प्रकरणावर बोलणं टाळलं…

ठाण्यात घडलेल्या प्रदीप पूर्णेकर यांच्या हत्या प्रकरणात आपल्यावर केले जाणारे आरोप माजी महापौर मीनाक्षी शिंदे यांनी पत्रकार परिषद घेऊन फेटाळले आहेत. पूर्णेकर कुटुंबीयांकडून आपल्यावर आरोप करण्यात आले असले तरी, एफआयआरमध्ये सुरुवातीला आपले नाव नसल्याचे त्यांनी सांगितले.

या प्रकरणात ठाकरे गटाचे नेते संजय राऊत, आदित्य ठाकरे आणि उद्धव ठाकरे यांनी आपले नाव राजकीय हेतूने गोवण्याचा प्रयत्न केल्याचा आरोप मीनाक्षी शिंदे यांनी केला. ही खालच्या पातळीचे राजकारण असून, आपल्या पक्षाचे अस्तित्व टिकवण्यासाठी ही धडपड सुरू असल्याचा दावा त्यांनी केला. शिंदे गटाच्या कार्यकर्त्यांना अडकवण्यासाठी हे प्रयत्न सुरू आहेत, असेही त्या म्हणाल्या.

मीनाक्षी शिंदे यांनी दिशा सॅलियन हत्या प्रकरणाचा संदर्भ देत आदित्य ठाकरे यांचे नाव एफआयआरमध्ये अनेक वेळा नमूद असूनही त्यांना अटक का झाली नाही, असा सवाल केला. उद्धव ठाकरे यांनी मुख्यमंत्री असताना हे प्रकरण दाबण्याचा प्रयत्न केल्याचा आरोपही त्यांनी केला. दिशा सॅलियन प्रकरणाची नव्याने चौकशी करून आदित्य ठाकरे यांना अटक करण्याची मागणी त्यांनी पोलीस प्रशासनाकडे केली. आपल्यावरील आरोपांसाठी ठोस पुरावे देण्याचे आवाहन त्यांनी विरोधकांना केले आहे.