MHT-CET Exam Update : एमएच-सीईटी परीक्षा रद्द झाली की डिसेंबरमध्ये होणार? CET सेलने अफवांवर दिलं मोठं स्पष्टीकरण

एमएच-सीईटी परीक्षेच्या तयारी करणाऱ्या विद्यार्थ्यांसाठी एक महत्त्वाची सूचना सीईटी सेलकडून देण्यात आली आहे. सध्या समाजमाध्यमांवर आणि इतर काही माध्यमांतून एमएच-सीईटी परीक्षेच्या स्थितीबद्दल चुकीची माहिती पसरवली जात आहे. या पार्श्वभूमीवर, सीईटी सेलने एक अधिकृत परिपत्रक जारी करून स्पष्टीकरण दिले आहे.

सीईटी सेलने आपल्या परिपत्रकात म्हटले आहे की, एमएच-सीईटी परीक्षा जाहीर किंवा रद्द झाल्याची कोणतीही अधिकृत घोषणा करण्यात आलेली नाही. डिसेंबर महिन्यात परीक्षा आयोजित केली जाईल किंवा रद्द करण्यात आली आहे, अशा प्रकारच्या सर्व बातम्या निराधार आणि चुकीच्या आहेत. या माहितीमुळे विद्यार्थ्यांमध्ये संभ्रम निर्माण होत असून, त्यांची दिशाभूल केली जात आहे.

सीईटी सेलने अशा चुकीच्या बातम्या पसरवणाऱ्यांवर कठोर कारवाई करण्याचा इशारा दिला आहे. विद्यार्थ्यांचे भवितव्य लक्षात घेता, त्यांनी कोणत्याही अफवांवर विश्वास ठेवू नये असे आवाहन करण्यात आले आहे. एमएच-सीईटी परीक्षेसंबंधी कोणतीही अधिकृत माहिती केवळ सीईटी सेलच्या अधिकृत संकेतस्थळावरच प्रसिद्ध केली जाईल. विद्यार्थ्यांनी केवळ अधिकृत स्त्रोतांवरून मिळालेल्या माहितीवरच विश्वास ठेवावा आणि कोणत्याही चुकीच्या माहितीमुळे विचलित होऊ नये.