बड्या NCP नेत्याची श्रीकांत शिंदेंसोबत बंद दाराआड चर्चा; मध्यरात्रीच्या बैठकीत… राजकारणात काहीतरी मोठं घडणार?

राज्यात विविध ठिकाणी राजकीय हालचालींना वेग आला असून नेत्यांच्या गाठीभेटींमुळे चर्चांना उधाण आले आहे. अशातच राष्ट्रवादी काँग्रेस (अजीत पवार) गटाचे आमदार प्रताप पाटील चिखलीकर यांनी शिवसेना शिंदे गटाचे खासदार श्रीकांत शिंदे यांची नांदेडमध्ये मध्यरात्री भेट घेतल्याची माहिती समोर आली आहे. शिवसंवाद दौऱ्यानिमित्त श्रीकांत शिंदे नांदेड दौऱ्यावर आले होते.

मिळालेल्या माहितीनुसार, रात्री साडे 12 वाजण्याच्या सुमारास एका हॉटेलमध्ये दोन्ही नेत्यांमध्ये जवळपास आर्धातास बंद दाराआड चर्चा झाली. या बैठकीत शिवसेना शिंदे गटाचे काही आमदारही उपस्थित असल्याचे सांगितले जात आहे. विशेष म्हणजे नांदेडची जागा भाजपला मिळण्याची शक्यता व्यक्त केली जात असताना प्रताप पाटील चिखलीकर यांचे सुपुत्र प्रवीण पाटील चिखलीकर यांनी निवडणुकीचा अर्ज घेतल्यामुळे या भेटीला अधिक महत्त्व प्राप्त झाले आहे.

महापालिका निवडणुकीत राष्ट्रवादी काँग्रेस आणि शिवसेनेने केलेल्या युतीचा प्रयोग आता विधानपरिषद निवडणुकीत पुन्हा पाहायला मिळणार का, याकडे नांदेडकरांचे लक्ष लागले आहे.