राजसाहेबांचं झंझावाती भाषण झोंबलंय, पिक्चर अभी बाकी है मेरे दोस्त, मनसे नेत्याचा राऊतांना इशारा

भाजपचे उमेदवार नारायण राणे यांच्या प्रचारार्थ काल मनसे अध्यक्ष राज ठाकरे यांची कोकणात जाहीर सभा झाली. यासभेत राज ठाकरे यांनी उद्धव ठाकरेंवर सडकून टीका केली. यानंतर विरोधकांनी राज ठाकरेंसह नारायण राणेंवर टीका केली. राज ठाकरेंच्या सभेनंतर आज सकाळी संजय राऊत यांनी ‘राज ठाकरे मौनी खासदारांचं समर्थन करत आहेत. ही त्यांची मजबुरी आहे. राज ठाकरेंचा देव बदलु शकतो’, अशी खोचक टीका केली होती. त्यावर मनसे नेते अमेय खोपकर यांनी ट्विट करत संजय राऊतांना प्रत्युत्तर दिले आहे. अमेय खोपकर यांनी आपल्या ट्वीटमध्ये असं म्हटलं की, राजसाहेब ठाकरे यांची कणकवलीमधली सभा दणदणीत झाली. राजसाहेबांचं झंझावाती भाषण कसं झोंबलंय ते सकाळच्या रडत राऊतांच्या रडगाण्यावरुन जनतेला कळलंच असेल. विरोधकांना सळो की पळो करणारी राजसाहेबांची शैली या निवडणुकीतला हायलाईट ठरणार हे नक्की’, असा विश्वासही अमेय खोपकर यांनी व्यक्त केला. तर पिक्चर अभी बाकी है मेरे दोस्त, असं म्हणत अमेय खोपकर यांनी संजय राऊत यांना इशाराच दिलाय.