BMC Election: ठाकरे बंधूंच्या युतीची निवडणुकीत ताकद, महायुतीशी थेट लढत, मुंबईत कोणाचे किती नगरसेवक जिंकू शकतात?

मुंबई महापालिकेची आगामी निवडणूक दोन्ही ठाकरे बंधूंसाठी अत्यंत महत्त्वाची मानली जात आहे. विधानसभेतील पराभवानंतर उद्धव ठाकरे आणि राज ठाकरे यांनी युतीची घोषणा केली आहे. या युतीचा मुख्य मुद्दा मराठी अस्मिता हा असेल, असे स्पष्ट करण्यात आले आहे. मुंबई महापालिकेच्या २२७ जागांसाठी ही निवडणूक होणार असून, प्रमुख लढत ठाकरे बंधूंच्या युती आणि भाजप, शिंदे गट व आठवलेंच्या रिपाइं यांचा समावेश असलेल्या महायुतीमध्ये अपेक्षित आहे. काँग्रेसने स्वतंत्र लढण्याची घोषणा केली आहे, तर समाजवादी पक्ष आणि एमआयएमचा काही जागांवर प्रभाव आहे.

२०२४ च्या विधानसभा निवडणुकीतील मतांच्या टक्केवारीनुसार, मुंबईत भाजपला ३२.७ टक्के आणि शिंदे गटाच्या शिवसेनेला १९.८ टक्के मते मिळाली होती, ज्यांची बेरीज ५२.५ टक्के होते. तर उद्धव ठाकरेंच्या शिवसेनेला २६ टक्के आणि मनसेला ८ टक्के मते मिळाली होती, ज्यांची एकूण टक्केवारी ३४ टक्के आहे. या आकडेवारीनुसार, महायुतीला १३० ते १३५ नगरसेवक जिंकता येऊ शकतात, तर ठाकरे बंधूंच्या युतीला ७५ ते ८० जागा मिळण्याची शक्यता आहे. काँग्रेस आणि इतरांना २५ ते ३० जागा मिळू शकतात. ही आकडेवारी विधानसभेच्या मतांवर आधारित असून, महापालिका निवडणुकीत यात बदल होऊ शकतो.