प्रवाशांनो कृपया लक्ष द्या! लोकल रेल्वेचं वेळापत्रक बघूनचं घराबाहेर पडा
वर्षाच्या शेवटच्या रविवारी मुंबईच्या मध्य, हार्बर आणि पश्चिम रेल्वे मार्गांवर अभियांत्रिकी कामांसाठी मेगा ब्लॉक घेण्यात येत आहे. सकाळी ११ ते दुपारी पावणेचार वाजेपर्यंत चालणाऱ्या या ब्लॉकमुळे मध्य रेल्वेवरील फास्ट लोकल सेवा वळवण्यात येणार असून एकूण ३३३ लोकल फेऱ्या रद्द झाल्या आहेत. प्रवाशांना विलंब होणार असल्याने रेल्वे प्रशासनाने सहकार्य करण्याचे आवाहन केले आहे.
वर्षाच्या शेवटच्या रविवारी मुंबईतील मध्य, हार्बर आणि पश्चिम रेल्वे मार्गांवर मेगा ब्लॉक जाहीर करण्यात आला आहे. अभियांत्रिकी कामांसाठी घेण्यात आलेल्या या ब्लॉकमुळे प्रवाशांना काही प्रमाणात विलंब आणि गैरसोयीचा सामना करावा लागणार आहे.
मध्य रेल्वेवर माटुंगा ते मुलुंड दरम्यान अप आणि डाऊन जलद मार्गांवर सकाळी ११ ते दुपारी पावणेचार वाजेपर्यंत ब्लॉक असेल. यामुळे डाउन जलद लोकल माटुंगा येथे धीम्या मार्गावर वळवण्यात येतील, तर अप जलद लोकल मुलुंड येथे धीम्या मार्गावर वळवल्या जातील. हार्बर मार्गावरही याच वेळेत (सकाळी ११ ते दुपारी पावणेचार वाजेपर्यंत) अभियांत्रिकी कामांसाठी ब्लॉक घेण्यात येत आहे.
पश्चिम रेल्वेवर कांदिवली ते बोरीवली दरम्यान सहाव्या मार्गीकेच्या कामासाठी बोरीवली स्थानकात ब्लॉक घोषित करण्यात आला आहे. यामुळे आज आणि उद्या एकूण ३३३ लोकल फेऱ्या रद्द होणार आहेत. रेल्वे प्रशासनाने प्रवाशांना सहकार्य करण्याचे आवाहन केले असून, रविवारचा प्रवास नियोजित करत असाल तर वेळापत्रक पाहून प्रवासाची योजना करावी.
