PM Modi : मुख्यमंत्री ते पंतप्रधान; नरेंद्र मोदींच्या राजकीय प्रवासाला 25 वर्षे पूर्ण

पंतप्रधान नरेंद्र मोदी यांनी सरकारचे प्रमुख म्हणून सलग 25 वर्षे अखंड सेवेचा एक महत्त्वाचा आणि ऐतिहासिक टप्पा गाठला आहे. 7 ऑक्टोबर 2001 रोजी नरेंद्र मोदी यांनी पहिल्यांदाच गुजरातचे मुख्यमंत्री म्हणून सत्तेची सूत्रे हाती घेतली होती. तेव्हापासून आजपर्यंत 25 वर्षे पूर्ण झाली आहेत, ज्यामध्ये त्यांनी गुजरातचे मुख्यमंत्रीपद आणि त्यानंतर भारताचे पंतप्रधानपद भूषवले आहे. या अद्वितीय आणि दीर्घ राजकीय प्रवासाचा गौरव करण्यासाठी देशभरात विविध कार्यक्रमांचे आयोजन करण्यात आले आहे. केंद्रीय मंत्रिमंडळाने एका विशेष ठरावाद्वारे पंतप्रधानांच्या या उल्लेखनीय प्रवासाचे कौतुक केले आहे.

या विशेष दिनी पंतप्रधान मोदींनी सकाळी दिल्लीतील सरोजिनी नगरमधील विनायक मंदिरात जाऊन दर्शन घेतले आणि आरतीही केली. या प्रसंगावर पंतप्रधान मोदींनी ट्वीट करत माहिती दिली. त्यांनी नमूद केले की, त्यांनी नवी दिल्लीतील विनायक मंदिरात पूजा-अर्चना आणि धार्मिक विधी केले. देशभरातील त्यांच्या कुटुंबीयांच्या सुख-समृद्धी आणि उत्तम आरोग्यासाठी त्यांनी गणेशाकडे प्रार्थना केली. विघ्नहर्त्या गणेशाची कृपादृष्टी सर्वांवर राहो, सर्वांचे कल्याण होवो आणि आपला देश निरंतर प्रगतीच्या मार्गावर पुढे जात राहो, हीच प्रार्थना त्यांनी व्यक्त केली.