Nashik BJP: निष्ठावंत राहिले बाजूला, उपरेच लागले रडायला; नाशिक भाजपमधील पक्षांतराचा भावनिक खेळ

भाजपमध्ये सध्या जुने निष्ठावान कार्यकर्ते बाजूला पडत असून, नव्याने प्रवेश करणाऱ्यांची चलती आहे. याचे ज्वलंत उदाहरण नाशिकमधून समोर आले आहे, जिथे भाजपचे नेते दिनकर पाटील यांनी नुकत्याच झालेल्या जनसंवाद बैठकीत आपल्या राजकीय प्रवासाचे वर्णन करताना अश्रू ढाळले. विशेष म्हणजे, काही महिन्यांपूर्वी त्यांनी भाजपवर टीका केली होती आणि आता तेच ‘विकासासाठी’ पक्षात आल्याचे सांगत आहेत. दिनकर पाटील यांनी यापूर्वी काँग्रेस, जनता दल, मनसे अशा अनेक पक्षांमध्ये काम केले आहे. मनसेतून भाजपमध्ये प्रवेश करताना गिरीश महाजन यांनी त्यांचे स्वागत केले होते. पाटील यांच्या वारंवार बदलणाऱ्या भूमिकांमुळे आणि भावनिक उद्रेकांमुळे भाजपमधील निष्ठावान कार्यकर्त्यांमध्ये तीव्र नाराजी आहे. अनेक वर्षांपासून पक्षासाठी झटणाऱ्या कार्यकर्त्यांना सतरंज्या उचलण्याची वेळ आली असताना, पक्ष बदलून येणारे नेते अश्रू ढाळून सहानुभूती मिळवत असल्याचे चित्र नाशिकमध्ये दिसत आहे. यामुळे निष्ठावंत आणि नव्याने पक्षात आलेल्यांमध्ये संघर्ष निर्माण झाला आहे.