निवडणूक प्रशिक्षणासाठी आलेल्या शिक्षकाचा तो व्हिडीओ व्हायरल

नाशिकमध्ये आगामी मालेगाव महानगरपालिका निवडणुकीच्या तयारी दरम्यान एक महत्त्वाचा व्हिडीओ व्हायरल झाला आहे. 15 जानेवारीला होणाऱ्या निवडणुकीसाठी नियुक्त करण्यात आलेल्या कर्मचाऱ्यांच्या प्रशिक्षण सत्रात हा प्रकार उघडकीस आला. व्हायरल झालेल्या व्हिडीओमध्ये, प्रशिक्षणार्थी शिक्षकांनी मतदान यंत्रणा (EVM) आणि बॅलेट युनिट्स निष्क्रिय असल्याचे दाखवले आहे. दरम्यान, टीव्ही 9 मराठी या व्हिडीओची पुष्टी करत नाही.

मिळालेल्या माहितीनुसार, या EVM ची बॅटरी आणि मेमरी निष्क्रिय असल्याचा दावा करण्यात आला आहे. धक्कादायक बाब म्हणजे, बंद असलेल्या या मशीनवरच शिक्षकांना प्रशिक्षण आणि मार्गदर्शन दिले जात असल्याचा आरोप होत आहे. प्रशिक्षणासाठी सकाळी साडेनऊ वाजल्यापासून उपस्थित असलेल्या शिक्षकांना सकाळी 10 वाजून 58 मिनिटे झाली तरी मशीन सुरु झाले नव्हते, आणि जवळपास अकरा वाजेपर्यंतही त्यात काहीच फरक पडलेला नव्हता. यामुळे शिक्षकांमध्ये तीव्र नाराजी व्यक्त करण्यात आली आहे. “मशीन चालू झाले नाही, मग प्रशिक्षण कसे मिळणार?” असा प्रश्न त्यांनी उपस्थित केला आहे. शिक्षकांनी म्हटले आहे की त्यांना कोणतेही प्रभावी प्रशिक्षण मिळालेले नाही. निवडणूक प्रक्रियेतील महत्त्वाच्या घटकांनाच जर योग्य प्रशिक्षण मिळाले नाही, तर आगामी निवडणुकांमध्ये पारदर्शकतेवर प्रश्नचिन्ह निर्माण होऊ शकते, अशी चिंता या घटनेमुळे निर्माण झाली आहे.