FDA आयुक्त तुकाराम मुंढेंचा गेम चेंजर निर्णय; आता रक्तदान शिबिरांबाबतही नवे नियम

ब्लड डोनेशन संदर्भात अन्न व औषध प्रशासन (FDA) विभागाने नवी नियमावली जारी केली आहे. या नियमांनुसार, रक्तदान शिबिरांचे आयोजन केवळ रक्तपेढ्या (ब्लड सेंटर्स) करू शकतील, असे तुकाराम मुंढे यांनी स्पष्ट केले आहे. सामाजिक संस्था किंवा इतर कोणत्याही संस्थांना या शिबिरांचे आयोजक म्हणून काम करता येणार नाही. मात्र, या संस्था रक्तपेढ्यांच्या सहकार्याने शिबिरांमध्ये सहभागी होऊ शकतात. रक्तपेढ्यांकडे शिबिरे आयोजित करण्यासाठी आवश्यक तांत्रिक आणि वैद्यकीय मनुष्यबळ उपलब्ध असल्याने हा निर्णय घेण्यात आल्याचे मुंढे यांनी नमूद केले.

गेल्या काही दिवसांपासून एफडीएकडे अशा तक्रारी प्राप्त झाल्या होत्या की, काही रक्तदान शिबिरांमध्ये दात्यांना घड्याळे किंवा इतर मोफत भेटवस्तू देण्याचे आमिष दाखवले जात होते. मोफत भेटवस्तू देणे हा एक गुन्हा मानला जातो. या तक्रारींची चौकशी करण्यात आली आणि त्यामध्ये तथ्य आढळले. त्यामुळे, अशा शिबिरांना तात्पुरती स्थगिती देण्यात आली असून, संबंधितांविरोधात कारवाई सुरू आहे. एफडीए रक्तदानाच्या नियमांचे काटेकोरपणे पालन सुनिश्चित करण्यासाठी कटिबद्ध आहे.