Tukaram Mundhe : 20 वर्ष नोकरी अन् 24 बदल्या… डॅशिंग तुकाराम मुंढे यांचं निलंबन होणार? भाजप नेत्याची आक्रमक मागणी

आपल्या डॅशिंग कार्यशैलीसाठी ओळखले जाणारे अधिकारी तुकाराम मुंडे पुन्हा एकदा चर्चेत आले आहेत. भाजप आमदार कृष्णा खोपडे यांनी नागपूर हिवाळी अधिवेशनात तुकाराम मुंडेंच्या निलंबनाची मागणी केली आहे. महाविकास आघाडी सरकारच्या काळात नागपूर महानगरपालिकेत आयुक्त असताना तुकाराम मुंडेंनी स्मार्ट सिटी प्रकल्पाचा प्रभार नियमबाह्यपणे घेतल्याचा, महिला अधिकाऱ्यांना दमदाटी केल्याचा आणि १७ कर्मचाऱ्यांना विनाकारण निलंबित केल्याचा आरोप खोपडे यांनी केला आहे. तसेच, सीईओचे अधिकार नसतानाही २० कोटी रुपये जारी केल्याचेही खोपडे म्हणाले.

खोपडे यांच्या म्हणण्यानुसार, हे आरोप गंभीर असून, त्यावर कारवाई झाली पाहिजे. मात्र, विरोधकांनी हे आरोप राजकीय हेतूने प्रेरित असल्याचे म्हटले आहे, विशेषतः पार्थ पवार प्रकरणाशी याचा संबंध जोडला जात आहे. जर आरोपांमध्ये तथ्य असेल, तर महाविकास आघाडी सरकारच्या कार्यकाळात किंवा त्यानंतरही कारवाई का झाली नाही, हा प्रश्न अनुत्तरित आहे. तुकाराम मुंडेंच्या २० वर्षांच्या सेवेत २४ वेळा बदल्या झाल्या आहेत, ज्यामुळे त्यांच्या कार्यशैलीवर आणि प्रशासकीय व्यवस्थेवर नेहमीच प्रश्नचिन्ह उपस्थित राहिले आहे.