Pune : भाजपच्या रफीक शेखचा हिंदूंवर हल्ला? अन् धंगेकरांनी साधला मोहोळांवर निशाणा

पुण्यात भाजपच्या अल्पसंख्यांक मोर्चाचे सचिव रफीक शेख यांच्यावर हिंदुत्ववादी कार्यकर्त्यांवर हल्ला केल्याचा गंभीर आरोप शिंदेसेनेचे रवींद्र धंगेकर यांनी केला आहे. पौड फाटा भागातील मेगासिटी वस्तीत झालेल्या या मारहाण प्रकरणात धंगेकरांनी भाजप नेते मुरलीधर मोहोळ यांच्यावरही टीका केली. मोहोळांच्या गुंडांनी हा हल्ला केल्याचा आरोप धंगेकरांनी केला आहे. विशेष म्हणजे, ज्या रफीक शेखवर हा आरोप आहे, त्याची नियुक्ती मोहोळांनीच केली असल्याचे धंगेकर म्हणतात.

या घटनेत हिंदुत्ववादी कार्यकर्त्यांवर पिस्तूल दाखवून हल्ला करण्यात आल्याचा आणि महिलांना मारहाण झाल्याचा दावाही करण्यात येत आहे. तसेच, मारहाणीत चार दुचाकी आणि दोन चारचाकी वाहनांची तोडफोड करण्यात आल्याचे म्हटले आहे. धंगेकरांनी रुग्णालयात दाखल झालेल्या चव्हाण नावाच्या पीडिताची भेट घेतली. मात्र, एका मुस्लिम व्यक्तीने आपणही मारहाणीचे बळी ठरलो असून, आपल्या गाड्या फोडल्या गेल्याचे सांगितले. या घटनेला धार्मिक रंग दिला जात असल्याचा आरोपही त्याने केला आहे. या प्रकरणावरून पुणे आणि महाराष्ट्राच्या राजकारणात नवे वादळ उठण्याची चिन्हे आहेत.