Pradeep Purnekar : प्रदीप पूर्णेकर प्रकरणात मोठी अपडेट; राजेंद्र शिंदेंनंतर आता…

ठाणे शहरातून एक महत्त्वाची बातमी समोर येत आहे. प्रदीप पूर्णकर हत्या प्रकरणात आता माजी महापौर मीनाक्षी शिंदे यांची चौकशी केली जाणार आहे. ठाणे पोलिसांचे खंडणीविरोधी पथक मीनाक्षी शिंदे यांना चौकशीसाठी बोलावणार असल्याची माहिती मिळाली आहे. या प्रकरणामुळे राजकीय वर्तुळात आणि पोलीस दलात खळबळ उडाली आहे.

प्रदीप पूर्णकर यांच्या मुलाने, राम पूर्णकर यांनी मीनाक्षी शिंदे आणि त्यांचे पती राजेंद्र शिंदे यांच्यावर गंभीर स्वरूपाचे आरोप केले आहेत. या आरोपांनंतर पोलीस यंत्रणा सक्रिय झाली आहे. यापूर्वी, मीनाक्षी शिंदे यांचे पती राजेंद्र शिंदे यांची सात वेळा चौकशी करण्यात आली आहे. तब्बल ५० तासांहून अधिक काळ त्यांची कसून चौकशी झाली असल्याचे कळते.

आता मीनाक्षी शिंदे यांची चौकशी केल्यावर या प्रकरणातून कोणती नवीन माहिती समोर येते, याकडे सर्वांचे लक्ष लागले आहे. खंडणीविरोधी पथकाकडून केली जाणारी ही चौकशी प्रकरणाच्या पुढील तपासात महत्त्वपूर्ण ठरणार आहे.