Pune Crime : धक्कादायक… कोचिंग क्लासमध्ये भोसकला धारदार चाकू अन्… 10वीच्या विद्यार्थ्याकडून मित्राची हत्या, पुण्यात खळबळ

पुण्यातील राजगुरुनगर येथे खासगी कोचिंग क्लासमध्ये घडलेल्या एका अत्यंत धक्कादायक घटनेने शिक्षण क्षेत्रासह समाजात खळबळ उडवून दिली आहे. दहावीच्या अल्पवयीन विद्यार्थ्याने जुन्या वादातून आपल्याच एका वर्गमित्राची चाकूने भोसकून हत्या केल्याची भयावह घटना उघडकीस आली आहे. माहितीनुसार, हा प्रकार आज सकाळी अंदाजे ८:३० ते ८:४५ च्या सुमारास राजगुरुनगर येथील एका खासगी कोचिंग क्लासमध्ये घडला. मृत विद्यार्थी आणि आरोपी विद्यार्थी हे दोघेही दहावीत शिकणारे होते आणि क्लासमध्ये शेजारी शेजारी बसले होते. त्यांच्यात काही काळापासून जुना वाद सुरू असल्याचे पोलिसांच्या प्राथमिक तपासात समोर आले आहे. याच वादातून आरोपी विद्यार्थ्याने मृताच्या मानेवर आणि पोटावर चाकूने वार केले, ज्यामुळे त्याचा जागीच मृत्यू झाला.

या घटनेची माहिती मिळताच पोलिसांनी तात्काळ घटनास्थळी धाव घेतली. खेड पोलीस सध्या या प्रकरणाचा सखोल तपास करत आहेत. पोलीस अधिकाऱ्यांनी दिलेल्या माहितीनुसार, हल्ल्याचे नेमके कारण आणि त्यामागील सखोल हेतू अद्याप पूर्णपणे स्पष्ट झालेला नाही. पोलिसांनी क्लासमधील इतर विद्यार्थ्यांशी तसेच शिक्षकांशी चर्चा केली आहे, परंतु त्यांनाही या वादाचे नेमके स्वरूप किंवा हत्येचे निश्चित कारण सांगता आले नाही.