पुण्यात न जिंकणाऱ्या जागा भाजप शिवसेनेला देतंय; धंगेकरांचा गंभीर आरोप

पुण्यात आगामी निवडणुकांपूर्वी महायुतीमधील जागावाटपावरून भाजप आणि शिंदे गटाच्या शिवसेनेत तिढा निर्माण झाला आहे. शिवसेना नेते रवींद्र धंगेकर यांनी उघडपणे नाराजी व्यक्त करत भाजपवर गंभीर आरोप केले आहेत. भाजप शिवसेनेला न जिंकणाऱ्या जागा देत आहे, असे धंगेकरांनी म्हटले आहे. शिवसैनिक लाचार होऊन निवडणूक लढणार नाहीत. सन्मानानेच निवडणुका लढवल्या जातील, अशी भूमिका त्यांनी मांडली आहे.

या पार्श्वभूमीवर, रवींद्र धंगेकर यांचा मुलगा प्रणव धंगेकर पुणे प्रभाग क्रमांक २३ आणि २४ मधून अपक्ष निवडणूक लढवण्याच्या तयारीत असल्याची बाब समोर येत आहे. माझा मुलगा लढणार, ही बंडखोरी नाही तर स्वाभिमान आहे, असे धंगेकरांनी स्पष्ट केले. पक्षाकडून आपली कोंडी केली जात असल्याचा आरोपही त्यांनी अप्रत्यक्षपणे केला आहे. शिरसाठ यांनी मात्र धंगेकरांवर अन्याय होणार नाही आणि त्यांचे प्रश्न सोडवले जातील असे म्हटले आहे. मुख्यमंत्री एकनाथ शिंदे यांनी या प्रकरणात लक्ष घालण्यासाठी ज्येष्ठ मंत्री शंभूराज देसाई यांना आदेश दिल्याचेही नमूद करण्यात आले.