Oil Price Hike | गॅस तुटवड्यानंतर आता आणखी एक मोठा धक्का, तेल-तांदळाच्या दरात वाढ

राज्यात गॅस तुटवड्यामुळे नागरिकांना सिलेंडर मिळण्यात अडचणी येत असतानाच आता जीवनावश्यक वस्तूंच्या दरातही वाढ झाल्याने सर्वसामान्यांना दुहेरी फटका बसत आहे. युद्धाच्या पार्श्वभूमीवर तेलाच्या किमतीत वाढ झाल्याचे व्यापाऱ्यांकडून सांगितले जात आहे. किरकोळ बाजारात सूर्यफूल तेलाच्या किमतीत सुमारे 13 रुपयांची वाढ झाली आहे. सोयाबीन तेलाचे दर 140 रुपयांवरून 155 रुपयांपर्यंत पोहोचले आहेत. याशिवाय, बासमती तांदळाच्या दरात 5 ते 10 रुपयांची वाढ झाली आहे, तर डालड्याच्या किमतीही वाढल्या आहेत. पाम तेलाचे दर 120 रुपयांवरून 135 रुपये प्रति लिटर झाले आहेत. शेंगदाणा तेलही 180 रुपयांवरून 190 रुपये प्रति लिटरपर्यंत वाढले आहे. मार्केट यार्डमध्ये 15 किलोच्या डब्यामागे 30 ते 40 रुपयांची वाढ नोंदवली गेली आहे. बाहेरील राज्यांतून येणाऱ्या मालाची आवक कमी झाल्याने घाऊक बाजारातही 10 ते 12 टक्क्यांनी दरवाढ झाली आहे.
एकूणच, गॅस तुटवडा आणि वाढती महागाई यामुळे राज्यातील नागरिकांवर आर्थिक ताण वाढत असल्याचे चित्र दिसून येत आहे.