Pune Ganpati Visarjan : ढोल-ताशांचा निनाद, गुलालाची उधळण अन्… पुण्याच्या विसर्जन मिरवणुकीचं ड्रोन दृश्य पाहून डोळेच दिपतील

पुण्यातील गणेश विसर्जन सोहळा हा दरवर्षीप्रमाणेच मोठ्या उत्साहात साजरा झाला. आपल्या लाडक्या बाप्पाला निरोप देण्यासाठी पुणेकर सज्ज झाले होते. टीव्ही ९ मराठीने या विसर्जन मिरवणुकीचे खास ड्रोन दृष्य प्रसारित केले आहे, ज्यातून पुणेकरांचा उत्साह आणि पारंपरिक सोहळ्याचे भव्य दर्शन घडते.

मिरवणुकीत ढोल-ताशांचा गजर, गुलालाची उधळण आणि पारंपरिक नृत्यांनी परिसर दुमदुमून गेला होता. मानाचा पहिला गणपती, कसबा गणपतीची विसर्जन मिरवणूक या ड्रोन दृष्यातून पाहता येते. यासोबतच शिवरुद्र ताल नादब्रह्म समर्थ, तसेच अनेक ढोल-ताशा पथके आणि लेझीम पथके सहभागी होऊन सोहळ्याची शोभा वाढवत होती. प्रत्येक चौकात ढोल-ताशांचा निनाद ऐकू येत होता, ज्यामुळे संपूर्ण परिसर उत्साहात न्हाऊन निघाला होता.

मानाचे पाचही गणपती आणि त्यानंतर निघणारी श्रीमंत दगडूशेठ हलवाई गणपतीची विसर्जन मिरवणूक हे पुणेकरांसाठी नेहमीच आकर्षणाचे केंद्र असते. रथ आणि चित्ररथांनी सजलेल्या या मिरवणुका शिस्तबद्ध पद्धतीने पुढे सरकत होत्या. गुलालाने संपूर्ण परिसर गुलाबी रंगात न्हाऊन निघाला होता, जणू काही आपण दख्खनच्या राजाच्या दरबारातच उपस्थित आहोत अशी अनुभूती येत होती. टीव्ही ९ मराठीवरील या विशेष ड्रोन दृष्यांमुळे या भव्य सोहळ्याचे विहंगम आणि अनुपम दर्शन घडले.