Pune : पुण्यातील ऐतिहासिक नूमवी प्रशालेत पाकिस्तानचे झेंडे; जय श्री राम चित्रपटाच्या शूटिंगवरून नवा वाद

पुण्यातील प्रसिद्ध नूमवी प्रशाला सध्या एका मोठ्या वादामुळे चर्चेत आहे. जय श्री राम नावाच्या चित्रपटाच्या चित्रीकरणादरम्यान शाळेच्या परिसराला पाकिस्तान देशाचे स्वरूप देण्यात आल्याने तीव्र संताप व्यक्त होत आहे. शाळेच्या आवारात पाकिस्तानचे झेंडे लावून तसेच चांद-तारा चिन्ह असलेल्या लाल-हिरव्या पताका वापरून कराची शहराचे चित्रण करण्यात आले आहे. विशेष म्हणजे, शाळेचे संस्थापक विष्णुशास्त्री चिपळूणकर यांच्या पुतळ्यालाही झाकून ठेवण्यात आले आणि त्याठिकाणी पाकिस्तानचा झेंडा लावण्यात आला.

अप्पा बळवंत चौकाजवळ असलेल्या या शाळेत सुरू असलेल्या चित्रीकरणामुळे माजी विद्यार्थी, शिक्षणप्रेमी आणि नागरिकांनी तीव्र नाराजी व्यक्त केली आहे. सोशल मीडियावर या घटनेविरोधात संतप्त प्रतिक्रिया उमटत आहेत. शाळेच्या ऐतिहासिक आणि शैक्षणिक मूल्यांशी छेडछाड केल्याचा आरोप करत या प्रकारावर त्वरित कारवाई करण्याची मागणी केली जात आहे. या धक्कादायक घटनेमुळे पुणे शहरात एक नवा राजकीय आणि सामाजिक वाद निर्माण झाला आहे. टीव्ही नाईन मराठीच्या माहितीनुसार, या प्रकरणावर नागरिकांकडून तीव्र प्रतिक्रिया येत आहेत.