पुणे शिक्षक मतदारसंघात मोठी घडामोड! सचिन सानप यांची मोठी प्रतिक्रिया, म्हणाले…

पुणे शिक्षक मतदारसंघासाठी अपक्ष उमेदवार सचिन सानप यांनी मुख्यमंत्री एकनाथ शिंदे यांच्या नेतृत्वाखालील शिवसेनेच्या पाठिंब्याची मागणी केली आहे. नंदनवन बंगल्यावर उद्योगमंत्री उदय सामंत आणि शंभूराज देसाई यांच्याशी झालेल्या चर्चेनंतर सानप यांनी आपली भूमिका स्पष्ट केली. शिंदे साहेबांचा आशीर्वाद मिळाल्यास आपण नक्कीच आमदार होऊ, असा विश्वास सानप यांनी व्यक्त केला. सचिन सानप हे गेली अनेक वर्षे शिक्षकांसाठी काम करत असून, शिक्षक संघटनांच्या पाठिंब्यावरच त्यांनी या निवडणुकीत उतरण्याचा निर्णय घेतला आहे.

आदरणीय शिंदे साहेबांचे शिक्षकांच्या प्रश्नांबाबत कायम सकारात्मक धोरण राहिले आहे, त्यामुळे ते आपल्याला पाठिंबा देतील, अशी आशा सानप यांनी व्यक्त केली. यापूर्वीही त्यांनी शिंदे आणि सामंत यांना पाठिंब्यासाठी विनंती केली होती. दुसरीकडे, भाजपचे कौस्तुभ गावडे हे देखील या मतदारसंघातून उमेदवार आहेत. एकनाथ शिंदे यांनी युती धर्म पाळण्यावर भर दिला असला तरी, शिंदे गटाची ताकद सानप यांच्या पाठीशी उभी राहिल अशी चर्चा आहे. मंगेश चिवटे यांनी उमेदवारी अर्ज मागे घेतल्यानंतर त्यांनीही सानप यांना सकारात्मक प्रतिसाद दिला आहे. या निवडणुकीत शिंदे साहेब, सामंत साहेब आणि देसाई साहेब यांसारख्या प्रमुख नेत्यांचा आशीर्वाद आपल्याला मिळावा, अशी अपेक्षा सानप यांनी व्यक्त केली.