राहुल बोंद्रे यांच्या अडचणी वाढल्या! शैक्षणिक संस्थांच्या चौकशीसाठी पोलिसांची नोटीस

बुलढाणा जिल्ह्यातील चिखलीचे माजी आमदार राहुल बोंद्रे यांना पोलिसांनी नोटीस बजावली आहे. त्यांच्या १९९३ पासून चालवल्या जाणाऱ्या संस्थांची सविस्तर माहिती सादर करण्यास सांगण्यात आले आहे. स्वतः राहुल बोंद्रे यांनी सोशल मीडियावर पोस्ट करून ही माहिती दिली आहे. ही नोटीस १५ दिवसांत सविस्तर माहिती सादर करण्याबाबत आहे. राहुल बोंद्रे यांच्या शैक्षणिक संस्थांवर बनावट कागदपत्रांच्या आधारे शासकीय निधी लाटल्याचा आणि शासकीय जमीन बळकावल्याचा आरोप आहे.

या प्रकरणी चिखली पोलीस ठाण्यात त्यांच्यावर तीन विविध गुन्हे दाखल आहेत, ज्यात ते सध्या जामिनावर आहेत. राहुल बोंद्रे यांनी या नोटिशीमागे राजकीय दबाव असल्याचा आरोप केला आहे. विशेष म्हणजे, महिनाभरापूर्वी राहुल बोंद्रे भारतीय जनता पक्षात (भाजप) प्रवेश करणार होते, परंतु काँग्रेस नेते राहुल गांधी यांच्या फोननंतर त्यांनी हा निर्णय मागे घेतला होता. या प्रकरणामुळे ते चांगलेच चर्चेत आले होते. आता पोलिसांची नोटीस मिळाल्याने राहुल बोंद्रे पुन्हा एकदा राजकीय वर्तुळात चर्चेचा विषय बनले आहेत.