Rahul Gandhi : मोदी, शाह, भागवत अन् ज्ञानेश कुमारांनी लोकशाही संपवली; राहुल गांधींचा थेट घणाघात, राहुल गांधी काय म्हणाले?

दिल्लीत काँग्रेस पक्षाने पुन्हा एकदा आंदोलन छेडले आहे. इंडिया आघाडीचे खासदार राहुल गांधी, प्रियंका गांधी आणि मल्लिकार्जुन खरगे यांच्यासह जंतरमंतरकडे निघाले असताना दिल्ली पोलिसांनी त्यांच्या बसेस रोखल्या. जंतरमंतरकडे जाणाऱ्या रस्त्यांवर मोठ्या प्रमाणात बॅरिकेटिंग आणि पोलीस बंदोबस्त तैनात करण्यात आला होता. यावेळी राहुल गांधींसह काँग्रेस कार्यकर्ते आणि खासदारांनी जोरदार घोषणाबाजी केली.

या आंदोलनादरम्यान राहुल गांधींनी केंद्र सरकारवर तीव्र शब्दांत हल्ला चढवला. राहुल गांधी म्हणाले, “मोदी, शाह, मोहन भागवत आणि ज्ञानेश कुमारांनी लोकशाही संपवली आहे.” ज्ञानेश कुमार हे देशाचे कायदेशीर निवडणूक आयुक्त नाहीत, हे देशाला सांगायचे आहे, असेही राहुल गांधींनी स्पष्ट केले. त्यांनी ज्ञानेश कुमार यांच्या राजीनाम्याची मागणी केली. “माझ्यावर १०० एफआयआर दाखल झाले तरी ते माझ्यासाठी पदकासमान असतील,” असे म्हणत राहुल गांधींनी आपला निर्धार व्यक्त केला. तसेच, “देशद्रोह्यांना आम्ही सोडणार नाही,” असा इशाराही त्यांनी दिला.