Nitesh Rane : विमानतळाची जमीन अदानींच्या घशात घालण्याचा प्लान, राज ठाकरेंच्या वक्तव्यावर नितेश राणे म्हणाले, चुकीची माहिती…

राज ठाकरे यांनी मुंबई आणि महाराष्ट्रातील महत्त्वपूर्ण प्रकल्पांबाबत चिंता व्यक्त केली आहे. त्यांनी म्हटले आहे की, सध्याचे छत्रपती शिवाजी महाराज आंतरराष्ट्रीय विमानतळ हळूहळू अदानींच्या हातात जाईल. येथून सर्व ऑपरेशन्स नवी मुंबईला हलवून कार्गो वाढवण बंदराला दिला जाईल, अशी शक्यता त्यांनी वर्तवली. वाढवण बंदराची मोठी जमीनही अदानींना देण्याचा प्रयत्न असल्याचे ठाकरे म्हणाले. महाराष्ट्राचे अस्तित्व मिटवून ही सर्व शहरं अदानी-अंबानींना दिली जात असल्याचा आरोप त्यांनी केला. भारतीय जनता पक्षाला मतदान करणाऱ्या मराठी लोकांनाही त्यांनी सावध केले की, गुजरातचा वरवंटा फिरल्यावर त्यांनाही मराठी म्हणूनच पाहिले जाईल.

राज ठाकरेंच्या या आरोपांवरून, राज्याचे बंदर खात्याचे मंत्री नितेश राणे यांनी प्रत्युत्तर दिले. त्यांनी स्पष्ट केले की, राज ठाकरेंना वाढवण बंदरासंदर्भात चुकीची माहिती दिली गेली आहे. राणे यांच्या म्हणण्यानुसार, वाढवण बंदरात महाराष्ट्र सरकारचा २६ टक्के वाटा आहे आणि या प्रकल्पामुळे १२ लाख तरुण-तरुणींना नोकरीच्या संधी उपलब्ध होतील. अशा प्रकारे १२ लाख रोजगार निर्माण करणारा प्रकल्प कसा चुकीचा असू शकतो, असा प्रश्न राणेंनी उपस्थित केला.