रत्नागिरीत घरगुती गॅसचा तुटवडा; युद्धजन्य परिस्थितीचा परिणाम!

रत्नागिरी शहरात सध्या घरगुती गॅस सिलेंडरचा तुटवडा तीव्रतेने जाणवत आहे. युद्धजन्य परिस्थितीचा परिणाम गॅस पुरवठ्यावर झाल्याने ही समस्या निर्माण झाली आहे. शहरातील अनेक भागांमध्ये घरगुती गॅस सिलेंडर उपलब्ध नसल्याने नागरिकांची मोठी गैरसोय होत आहे.

गॅस वितरकांनी घरपोच डिलिव्हरी करणे थांबवल्यामुळे, ग्राहकांना नाइलाजाने गॅस एजन्सीच्या कार्यालयात जाऊन रांगा लावून सिलेंडर घ्यावे लागत आहेत. सणासुदीच्या दिवसांमध्येही डिलिव्हरी उपलब्ध नसल्याने नागरिकांमध्ये तीव्र नाराजी आहे. अनेक ग्राहक आठ दिवसांपासून गॅससाठी प्रयत्न करत आहेत, तर काही जण महिन्याच्या पहिल्या तारखेपासून सिलेंडरच्या प्रतीक्षेत आहेत.

एका ग्राहकाने सांगितले की, डिलिव्हरी होणार नाही, तातडीने हवे असल्यास रांग लावून सिलेंडर घेऊन जावे लागेल असे त्यांना सांगण्यात आले. या परिस्थितीमुळे लोकांचे हाल होत असून, वाढलेल्या किमतींमुळेही ग्राहकांना अडचणींचा सामना करावा लागत आहे. युद्धजन्य स्थितीमुळे निर्माण झालेल्या या गॅस संकटाने रत्नागिरीतील जनजीवन विस्कळीत झाले आहे.