भाजप ज्या प्रकारचं राजकारण करतंय ते दुर्दैवी; राज ठाकरेंनी व्यक्त केली खंत

मनसे अध्यक्ष राज ठाकरे यांनी भारतीय जनता पक्षाच्या राजकारणावर तीव्र शब्दांत नाराजी व्यक्त केली आहे. देशभक्ती आणि भाजपभक्ती या दोन भिन्न संकल्पना असून, जो भाजपचा समर्थक आहे तोच देशभक्त असतो असे नाही, असे त्यांनी स्पष्ट केले. महाराष्ट्राने सध्याच्या दरिद्री राजकारणापासून दूर राहून देशाला दिशा दाखवण्याची गरज आहे, असे आवाहन ठाकरे यांनी केले.

राज ठाकरे यांनी मुंबईच्या भविष्याबद्दलही चिंता व्यक्त केली. मुंबईवर कब्जा करण्याऐवजी अहमदाबाद, बडोदा किंवा सुरतसारखी शहरे विकसित करावीत, असे ते म्हणाले. महाराष्ट्रातील जनतेने एकजुटीने राहणे महत्त्वाचे असून, भाजप मात्र या एकोप्यामध्ये मिठाचा खडा टाकण्याचे काम करत असल्याचा आरोप त्यांनी केला. विविध संकटांच्या वेळी शिवसैनिक आणि मनसैनिक कसे मदतीला धावतात, हे त्यांनी उदाहरणांसह सांगितले. हे राजकारण बाजूला सारून महाराष्ट्राने पुढे जावे, असे त्यांचे मत आहे.