Rohit Pawar | सुनेत्रा पवारांवरील गुंगी गुडिया टीकेवर रोहित पवारांची मोठी प्रतिक्रिया! इंदिरा गांधींचं उदाहरण देत काय म्हणाले?

काँग्रेसकडून उपमुख्यमंत्री सुनेत्रा पवार यांच्यावर करण्यात आलेल्या “गुंगी गुडिया” या टीकेवर राष्ट्रवादी काँग्रेस (शरद पवार गट)चे आमदार रोहित पवार यांनी प्रतिक्रिया दिली आहे. या विषयावर बोलताना त्यांनी कोणतीही सकारात्मक किंवा नकारात्मक भूमिका न घेता ऐतिहासिक संदर्भ देत आपले मत व्यक्त केले.

रोहित पवार म्हणाले की, “सुनेत्रा पवार यांच्याबाबत काँग्रेसने केलेल्या ‘गुंगी गुडिया’ या वक्तव्यावर मी सकारात्मक किंवा नकारात्मक काहीही बोलू शकत नाही. जर अजित पवार यांच्या पक्षातील लोकांना हे वक्तव्य चुकीचे वाटत असेल, तर त्याबाबत त्यांनी भूमिका घ्यावी.” असे ते म्हणाले.

यावेळी त्यांनी माजी पंतप्रधान इंदिरा गांधी यांचाही संदर्भ दिला. “एकेकाळी इंदिरा गांधी यांनाही ‘गुंगी गुडिया’ असे संबोधले जात होते. त्या सुरुवातीला शांत स्वभावाच्या असल्याची प्रतिमा होती. मात्र, जेव्हा देशाची जबाबदारी त्यांच्या खांद्यावर आली, तेव्हा त्यांनी सक्षम नेतृत्व सिद्ध केले,” असे रोहित पवार यांनी सांगितले.

याच पत्रकार परिषदेत बीड जिल्ह्यातील वाढत्या गुन्हेगारीच्या मुद्द्यावरही त्यांनी भाष्य केले. पत्रकारांनी प्रश्न विचारल्यानंतर एका स्थानिक नेत्याने पत्रकाराला गप्प बसवण्याचा प्रयत्न केल्याचा आरोप करत, अशा प्रकारची दादागिरी लोकशाहीसाठी योग्य नसल्याचे त्यांनी म्हटले. बीडमधील काही गुन्हेगारांशी सत्ताधारी नेत्यांचे संबंध असल्याचा आरोपही त्यांनी केला.

दरम्यान, सुनेत्रा पवार यांच्यावरील काँग्रेसच्या टीकेनंतर आणि त्यावर रोहित पवार यांनी दिलेल्या प्रतिक्रियेमुळे राज्याच्या राजकारणात नव्या चर्चांना उधाण आले असून, या प्रकरणावर महायुती आणि काँग्रेसकडून पुढे काय भूमिका घेतली जाते, याकडे राजकीय वर्तुळाचे लक्ष लागले आहे.