Sachin Kharat On Abhijeet Dipake : फुटीरवादी नेत्यांमुळे आंबेडकरी चळवळीचं नुकसान; सचिन खरातांचा अभिजीत दिपकेंवर थेट निशाणा, पण खरात असं का म्हणाले?

रिपब्लिकन पार्टी ऑफ इंडिया (खरात गट) चे सचिन खरात यांनी अभिजीत दिपके यांच्यावर गंभीर आरोप केले आहेत. दिपके यांच्यासारख्या फुटीरवादी नेत्यांमुळेच आंबेडकरी चळवळीचे नुकसान होत असून, ते डॉ. बाबासाहेब आंबेडकरांच्या रिपब्लिकन पार्टी ऑफ इंडियाला पुढे नेण्याऐवजी इतर पक्षांसाठी काम करत असल्याचा दावा खरात यांनी केला.

खरात यांच्या मते, अभिजीत दिपके यांनी स्वतःला विद्यार्थी नेता म्हणून जंतर-मंतर येथे विद्यार्थी न्याय आंदोलनाचे नेतृत्व केले होते. मात्र, आता त्यांनी राजकारण सुरू केले आहे, ज्यामध्ये निवडणूक आयुक्त ज्ञानेश कुमार यांच्या राजीनाम्याची मागणी मुंबईत केली. अलीकडेच, पुण्यात सुरू असलेल्या एमपीसी विद्यार्थ्यांच्या तीन वेगवेगळ्या आंदोलनांपैकी, दिपके यांनी केवळ एकाच आंदोलनाला भेट देऊन पाठिंबा दिला. यामुळे एमपीसी विद्यार्थ्यांच्या आंदोलनात फूट पडल्याचा आरोप खरात यांनी केला.

खरात यांनी अभिजीत दिपके यांना ‘डुप्लिकेट’ आणि ‘गद्दार’ विद्यार्थी नेता संबोधत, एमपीसी विद्यार्थ्यांनी त्यांच्यापासून सावध राहावे असे आवाहन केले आहे. आंबेडकरी विचार आणि वंचितांना न्याय देण्याच्या कामाला पुढे नेण्यासाठी रिपब्लिकन पार्टी ऑफ इंडिया (खरात गट) कार्यरत असल्याचे त्यांनी नमूद केले.