Shekhar Bhoyar : भाजपने उमेदवारीचा शब्द दिला, पण… शेखर भोयर नेमकं काय म्हणाले?

शिक्षकांच्या प्रश्नांसाठी सातत्याने काम करत असलेले शेखर भोयर यांनी भारतीय जनता पक्षावर (भाजप) गंभीर आरोप केले आहेत. पक्षप्रवेशावेळी भाजपने आपल्याला उमेदवारीचा शब्द दिला होता; परंतु तो पाळला नाही, असे भोयर यांनी म्हटले आहे. २०२० मध्ये भाजपने ही जागा लढवली होती आणि त्यावेळी त्यांना तयारीला लागण्यास सांगितले होते, असेही ते म्हणाले.

गेल्या १८ वर्षांपासून आपण शिक्षकांच्या समस्यांवर काम करत असून, मागील निवडणुकीत थोड्या मतांनी पराभव झाला नसून, निवडणूक प्रक्रियेतूनच आपल्याला बाद करण्यात आले होते, असा दावा भोयर यांनी केला. सत्तेचा दुरुपयोग करून आपल्याला निवडणुकीतून बाहेर काढल्याचे त्यांचे म्हणणे आहे.

सद्यस्थितीत अमरावती विभागातील विद्यमान आमदार मतदारसंघात अनुपस्थित असून, त्यांनी कोणतेही काम केले नसल्याचा आरोप भोयर यांनी केला. सहा वर्षांनंतर ते केवळ फॉर्म भरण्यासाठी दिसले. आपल्या बंडामुळे पक्षाने निष्कासित केले असले तरी, शिक्षकांच्या प्रश्नांसाठी हे बंड कायम राहील, असे भोयर यांनी ठामपणे सांगितले. अमरावती विभागातील शिक्षकांनी निष्क्रिय आमदाराला या निवडणुकीत बाजूला ठेवण्याचा निर्णय घेतल्याचे त्यांनी नमूद केले.