सुप्रीम कोर्टातील सुनावणीआधी कानमंत्र; शिंदेकडून नेत्यांना महत्त्वाच्या सूचना… मोठी अपडेट समोर

शिवसेना पक्ष आणि चिन्ह प्रकरणी सुप्रीम कोर्टात आज दुपारी दोन वाजता महत्त्वपूर्ण सुनावणी पार पडणार आहे. हे प्रकरण आता अंतिम टप्प्यात पोहोचले असून, सरन्यायाधीश सूर्यकांत यांच्या खंडपीठासमोर यावर युक्तिवाद होणार आहे. शिंदे गटाकडून आजच्या सुनावणीकडे मोठ्या गांभीर्याने पाहिले जात आहे, कारण या प्रकरणाचा निकाल पक्षाच्या भविष्यासाठी अत्यंत महत्त्वाचा ठरू शकतो.

सूत्रांनी दिलेल्या माहितीनुसार, शिंदे गटाने या सुनावणीसाठी आपली रणनीती निश्चित केली आहे. शिंदेंच्या वकिलांनी ठाकरे गटाच्या वकिलांचा युक्तिवाद कसा खोडून काढायचा, यावर विशेष लक्ष केंद्रित केले आहे. राजकीय दृष्ट्या शिंदे गट पूर्णपणे आत्मविश्वासू असून, त्यांच्या मते संख्याबळ त्यांच्या बाजूने असल्याने ते या राजकीय परीक्षेत उत्तीर्ण होतील. सुनावणीच्या पार्श्वभूमीवर शिंदे गटाच्या नेत्यांना पक्षाकडून महत्त्वाच्या सूचना देण्यात आल्या आहेत. “कोर्टात आपली बाजू मांडू तेव्हा विरोधकांची तोंडं बंद होतील. बातम्यांवर काही लक्ष देऊ नका, विभागात जोमानं काम करा,” असा सल्ला शिंदेंकडून सर्व नेत्यांना देण्यात आला आहे. या सूचनांमधून शिंदे गटाचा या प्रकरणावर असलेला विश्वास दिसून येतो.