बुलढाण्यात राजकीय वाद विकोपाला; महालेंनी गायकवाडांच्या मतदारसंघात जाऊन अजब पद्धतीने साजरा केला वाढदिवस
बुलढाणा जिल्ह्यात महायुतीतील वाद आता विकोपाला पोहोचला आहे. आमदार श्वेता महाले यांनी पती विद्याधर महाले यांचा वाढदिवस प्रतिस्पर्धी आमदार संजय गायकवाड यांच्या मतदारसंघात जेसीबीने पुष्पवृष्टी करत साजरा केला. यावेळी बॅंजोच्या तालावर ठेका धरत आणि बाण मारण्याची ॲक्शन करत महालेंनी गायकवाडांना डिवचले. या घटनेने स्थानिक राजकारण चांगलेच तापले आहे.
बुलढाणा जिल्ह्यात महायुतीमधील अंतर्गत वाद आता तीव्र झाला आहे. आमदार श्वेता महाले यांनी त्यांचे पती विद्याधर महाले यांचा वाढदिवस प्रतिस्पर्धी आमदार संजय गायकवाड यांच्या मतदारसंघात मोठ्या उत्साहात साजरा केला. या कार्यक्रमात जेसीबीच्या साहाय्याने पुष्पवृष्टी करण्यात आली. तसेच बॅंजोच्या तालावर श्वेता महाले यांनी ठेका धरला. बाप तो बाप रहेगा हे गाणेही यावेळी वाजवण्यात आले आणि फटाक्यांची जोरदार आतषबाजी करण्यात आली. या वाढदिवस सोहळ्यात श्वेता महाले यांनी बाण मारण्याची ॲक्शन करत संजय गायकवाडांना थेट डिवचले.
हा प्रकार राजकीय वर्तुळात चर्चेचा विषय बनला आहे. काही दिवसांपूर्वी संजय गायकवाड यांचे पुत्र कुणाल गायकवाड यांचा वाढदिवस श्वेता महाले यांच्या चिखली मतदारसंघात साजरा करण्यात आला होता. या घटनेला प्रत्युत्तर म्हणून महालेंनी आता बुलढाण्यात हा वाढदिवस सोहळा आयोजित केल्याचे बोलले जात आहे. यामुळे बुलढाणा जिल्ह्यातील महायुतीमधील संघर्ष अधिकच वाढला आहे.
