Thackeray Group On Delhi Andolan : दिल्लीतील इंडिया आघाडीच्या आंदोलनाकडे ठाकरे सेनेची पाठ? राष्ट्रपतींच्या भेटीवेळीही प्रतिनिधी….

इंडिया आघाडीच्या दिल्लीतील आंदोलनाकडे ठाकरे शिवसेनेने पाठ फिरवल्याचा प्रश्न सध्या राजकीय वर्तुळात उपस्थित होत आहे. आंदोलनाच्या पहिल्या दिवसानंतर ठाकरे सेनेचा एकही प्रतिनिधी उपस्थित नसल्याचे चित्र आहे. इंडिया आघाडीचे शिष्टमंडळ आज राष्ट्रपतींची भेट घेणार असून, त्यावेळीही ठाकरे सेनेकडून प्रतिनिधी गैरहजर राहण्याची शक्यता वर्तवण्यात येत आहे.

प्रारंभी, इंडिया आघाडीच्या दिल्लीतील मोर्चात शिवसेना (ठाकरे गट) चे खासदार उपस्थित होते. मात्र, त्यानंतर सलग तीन दिवसांच्या आंदोलनात, तसेच आज राष्ट्रपतींच्या भेटीच्या वेळीही ठाकरे गटाचे प्रतिनिधी अनुपस्थित राहणार असल्याची माहिती विश्वसनीय सूत्रांकडून मिळत आहे. उद्धव ठाकरे किंवा संजय राऊत हे दोघे प्रतिनिधी म्हणून उपस्थित राहतील, असे आधी सांगितले गेले असले तरी, संजय राऊत सध्या पुण्यात आहेत आणि उद्धव ठाकरे दिल्लीत येणार नाहीत. अरविंद सावंत आणि अनिल देसाई हेही गैरहजर राहण्याची शक्यता आहे. त्यामुळे, ठाकरे गटाने या आंदोलनाकडे पाठ फिरवली आहे का, असा प्रश्न निर्माण झाला आहे. आगामी काळात ठाकरे गटाची इंडिया आघाडीतील आंदोलनांमध्ये उपस्थिती महत्त्वाची ठरणार आहे.