टायगर श्रॉफच्या गाडीवर धाडधाड गोळ्या झाडल्या, पण कारण काय? बॉलिवूडची झोप उडवणारं कारण समोर!
मुंबईतील जुहू येथे अभिनेता टायगर श्रॉफच्या गाडीवर गोळीबार झाला असून, यात चालक जखमी झाला आहे. बिश्नोई गँगने या हल्ल्याची जबाबदारी स्वीकारली आहे. सलमान खानसोबत काम करणाऱ्यांना सोडणार नाही, अशी धमकी गँगने दिली आहे. मुंबई पोलीस या प्रकरणाचा तपास करत आहेत, तर टायगर श्रॉफ सुखरूप आहे.
मुंबईतील जुहू परिसरात अभिनेता टायगर श्रॉफच्या गाडीवर गुरुवारी गोळीबार झाल्याची धक्कादायक घटना समोर आली आहे. या घटनेत टायगर श्रॉफचा चालक गंभीर जखमी झाला असून त्याला नानावटी रुग्णालयात दाखल करण्यात आले आहे. सुदैवाने, टायगर श्रॉफला कोणतीही इजा झालेली नाही आणि तो सुखरूप असल्याची माहिती मुंबई पोलिसांनी दिली आहे. या गोळीबाराची जबाबदारी लॉरेन्स बिश्नोई गँगने स्वीकारली आहे. बिश्नोई गँगने एका ऑडिओ क्लिपद्वारे आणि सोशल मीडिया पोस्टद्वारे, “जो सलमान खानसोबत काम करेल, त्याला सोडणार नाही,” अशी थेट धमकी दिली आहे. या पोस्टमध्ये सलमान खानने माफी मागावी, अशी मागणीही करण्यात आली आहे.
मिळालेल्या माहितीनुसार, टायगर श्रॉफ फुटबॉल खेळून परत येत असताना पुष्पा पार्क परिसरात हा हल्ला झाला. दुचाकीवरून आलेल्या तीन अज्ञात व्यक्तींनी त्यांच्या गाडीवर तीन ते चार राऊंड फायर केले. मुंबई पोलीस आणि गुन्हे शाखा या प्रकरणाचा सखोल तपास करत असून, बिश्नोई गँगच्या दाव्याची सत्यता पडताळून पाहत आहेत. राज्याचे मंत्री आशिष शेलार यांनी या घटनेची निंदा करत, दोषींना सोडले जाणार नाही, असे आश्वासन दिले आहे.
