Kulgaon-Badlapur Municipality : अखेर तुषार आपटे यांचा भाजपानं घेतला राजीनामा, बदलापूर लैंगिक अत्याचार प्रकरणात होता आरोपी!

कुळगाव-बदलापूर नगरपरिषदेचे स्वीकृत नगरसेवक तुषार आपटे यांनी आपल्या पदाचा राजीनामा दिला आहे. रवींद्र चव्हाणांच्या आदेशानंतर आपटे यांनी हे महत्त्वपूर्ण पाऊल उचलले आहे. कुळगाव-बदलापूर नगरपरिषदेत स्वीकृत नगरसेवक म्हणून त्यांच्या नियुक्तीनंतर विरोधकांनी तीव्र टीका केली होती. या टीकेचे मुख्य कारण म्हणजे आपटे यांच्यावरील गंभीर आरोप होते. बदलापूर येथील एका बलात्कार प्रकरणात ते सहआरोपी होते, त्यांना अटकही झाली होती आणि नंतर त्यांना जामीन मंजूर झाला होता.

अशा पार्श्वभूमीवर भाजपकडून त्यांना स्वीकृत नगरसेवकपद देण्यात आल्याने विरोधी पक्षांनी भाजपवर जोरदार टीकास्त्र डागले होते. दिवसभर सुरू असलेल्या राजकीय घडामोडींनंतर आणि विरोधकांच्या दबावानंतर, अखेर तुषार आपटे यांनी आपल्या स्वीकृत नगरसेवक पदाचा राजीनामा ठाणे जिल्हाधिकाऱ्यांकडे पत्राद्वारे सादर केला आहे. रवींद्र चव्हाणांच्या आदेशानुसार हा निर्णय घेण्यात आल्याचे वृत्त आहे. या प्रकरणामुळे कुळगाव-बदलापूरच्या स्थानिक राजकारणात मोठी खळबळ उडाली आहे.